(تازہ حالات خصوصی رپورٹ )امریکی میڈیا رپورٹس کے مطابق امریکی تحقیقاتی ادارے ایف بی آئی (FBI) نے کیلیفورنیا کی پولیس کو ایک انتباہ جاری کیا ہے جس میں کہا گیا ہے کہ ایران ممکنہ طور پر امریکہ کے خلاف جوابی کارروائی کے طور پر ڈرون حملوں کی منصوبہ بندی کر سکتا ہے۔
امریکی نشریاتی ادارے اے بی سی نیوز کے مطابق اس انتباہ میں بتایا گیا کہ ایران ممکنہ طور پر سمندر میں موجود کسی نامعلوم جہاز سے ڈرون لانچ کر کے کیلیفورنیا کے غیر متعین اہداف کو نشانہ بنانے کی تیاری کر رہا تھا۔ رپورٹ کے مطابق یہ منصوبہ اس صورت میں عمل میں لایا جا سکتا تھا جب امریکہ ایران کے خلاف فوجی کارروائی شروع کرتا۔
تاہم رپورٹ میں یہ بھی کہا گیا ہے کہ اس ممکنہ حملے کے وقت، طریقہ کار یا ہدف کے بارے میں مزید تفصیلات دستیاب نہیں ہیں۔ ایف بی آئی کے لاس اینجلس دفتر نے اس حوالے سے تبصرہ کرنے سے انکار کر دیا جبکہ وائٹ ہاؤس کی جانب سے بھی فوری ردعمل سامنے نہیں آیا۔
یہ انتباہ ایسے وقت سامنے آیا جب امریکہ اور اسرائیل نے ایران کے خلاف فوجی کارروائیاں شروع کیں اور تہران نے اس کے جواب میں مشرقِ وسطیٰ میں مختلف مقامات پر ڈرون اور میزائل حملے کیے۔
امریکی انٹیلی جنس حکام کا کہنا ہے کہ انہیں اس بات پر بھی تشویش ہے کہ جدید ڈرون ٹیکنالوجی اب غیر ریاستی گروہوں کے ہاتھوں میں بھی پہنچ رہی ہے۔ رپورٹ میں یہ خدشہ بھی ظاہر کیا گیا کہ میکسیکو کے منشیات فروش گروہ بھی دھماکہ خیز مواد سے لیس ڈرون استعمال کرنے کی صلاحیت حاصل کر سکتے ہیں، جس سے امریکہ کی سرحدی سیکیورٹی کے لیے نئے خطرات پیدا ہو سکتے ہیں۔
امریکی محکمہ داخلی سلامتی کے سابق انٹیلی جنس سربراہ جان کوہن کے مطابق امریکہ کو مستقبل میں سمندر یا میکسیکو کی سرحد کے قریب سے ڈرون حملوں کے ممکنہ خطرے کو سنجیدگی سے لینا چاہیے۔ ان کے بقول ایران کے لاطینی امریکہ اور میکسیکو میں روابط موجود ہیں، جس کی وجہ سے ایسے خدشات کو مکمل طور پر نظر انداز نہیں کیا جا سکتا۔
ماہرین کا کہنا ہے کہ اس طرح کے انتباہات کا مقصد ریاستی اور مقامی سیکیورٹی اداروں کو ممکنہ خطرات سے پیشگی آگاہ کرنا اور تیاری بڑھانا ہوتا ہے تاکہ کسی بھی ہنگامی صورتحال سے بہتر انداز میں نمٹا جا سکے۔
