(تازہ حالات خصوصی رپورٹ )امریکہ اور اسرائیل کی جانب سے ایران پر حملوں کے آغاز کے چند دن بعد سامنے آنے والے نئے عوامی سرویز سے ظاہر ہوتا ہے کہ زیادہ تر امریکی شہری ان فوجی کارروائیوں کی حمایت نہیں کرتے۔ مختلف پولز کے مطابق حملوں کی حمایت کرنے والوں کے مقابلے میں ان کی مخالفت کرنے والوں کی تعداد نمایاں طور پر زیادہ ہے۔
امریکی میڈیا کی رپورٹ کے مطابق مشرقِ وسطیٰ میں جاری اس وسیع تنازع کو شروع ہوئے تقریباً پانچ دن گزر چکے ہیں۔ اس دوران امریکہ کے مختلف شہروں میں جنگ مخالف مظاہرے بھی دیکھنے میں آئے، جن میں مظاہرین نے ایران پر حملوں کو فوری طور پر روکنے کا مطالبہ کیا۔ واشنگٹن ڈی سی میں وائٹ ہاؤس کے باہر بھی مظاہرین نے احتجاج کیا اور بینرز اٹھا کر جنگ کے خاتمے کا مطالبہ کیا۔
دوسری جانب امریکی صدر ڈونلڈ ٹرمپ نے ایران پر حملوں کے حوالے سے مختلف مواقع پر مختلف دلائل پیش کیے ہیں۔ بعض بیانات میں انہوں نے کہا کہ یہ کارروائیاں ایران کی فوجی صلاحیتوں کو کمزور کرنے کے لیے ضروری تھیں، جبکہ بعض مواقع پر انہوں نے اس جنگ کو خطے میں سکیورٹی کے لیے ناگزیر قرار دیا۔ تاہم ناقدین کا کہنا ہے کہ حکومت کی پالیسی اور جنگ کے اہداف کے بارے میں واضح حکمت عملی سامنے نہیں آئی۔
رپورٹس کے مطابق اس تنازع کے دوران کم از کم چھ امریکی فوجی ہلاک بھی ہو چکے ہیں، جس کے بعد امریکہ کے اندر اس جنگ کے حوالے سے بحث مزید تیز ہو گئی ہے۔ دفاعی ماہرین کا کہنا ہے کہ اگر جنگ طویل ہوتی ہے تو اس کے سیاسی اور عوامی اثرات امریکہ کے اندر بھی نمایاں ہو سکتے ہیں۔
سیاسی تجزیہ کاروں کے مطابق امریکی عوام کی رائے اس بات پر بھی منحصر ہوگی کہ جنگ کتنی دیر تک جاری رہتی ہے اور اس کے نتائج کیا نکلتے ہیں۔ اگر تنازعہ طول پکڑتا ہے تو حکومت کو عوامی دباؤ اور سیاسی مخالفت کا سامنا کرنا پڑ سکتا ہے۔
