(تازہ حالات خصوصی رپورٹ )
امریکہ کے سابق صدر ڈونلڈ ٹرمپ نے چین کو ایران کی ممکنہ مدد پر سخت وارننگ جاری کرتے ہوئے کہا ہے کہ اگر بیجنگ تہران کو اسلحہ فراہم کرتا ہے تو اسے سنگین نتائج کا سامنا کرنا پڑ سکتا ہے۔ ان کا کہنا تھا کہ امریکا خطے میں طاقت کے توازن کو بگڑنے نہیں دے گا اور کسی بھی ایسی پیش رفت پر سخت ردعمل دیا جائے گا جو عالمی سلامتی کے لیے خطرہ بن سکتی ہو۔
یہ بیان ایک ایسے وقت میں سامنے آیا ہے جب ایران کی پاسدارانِ انقلاب (IRGC) نیوی نے آبنائے ہرمز سے متعلق سخت مؤقف اختیار کیا ہے۔ IRGC نیوی کے مطابق اگر کسی بھی فوجی جہاز نے اس اہم گزرگاہ سے گزرنے کی کوشش کی تو اسے بھرپور جواب دیا جائے گا۔ انہوں نے دعویٰ کیا کہ آبنائے ہرمز پر ان کا مکمل کنٹرول اور نگرانی موجود ہے۔
دوسری جانب ڈونلڈ ٹرمپ نے اپنے بیان میں کہا کہ امریکا اس اسٹریٹجک گزرگاہ کو کھلا رکھنے کے لیے اقدامات کرے گا، چاہے خود امریکا اس کا زیادہ استعمال نہ بھی کرتا ہو۔ ان کے مطابق دنیا کے کئی ممالک اس راستے پر انحصار کرتے ہیں اور وہ یا تو خوفزدہ ہیں یا کمزور، اس لیے امریکا ان کے مفادات کا بھی تحفظ کرے گا۔
ٹرمپ نے مزید کہا کہ بڑے بڑے آئل ٹینکرز امریکا کی جانب رواں دواں ہیں اور ملک میں تیل و گیس کی فراہمی جاری ہے، جس سے توانائی کے شعبے میں استحکام برقرار رکھا جا رہا ہے۔
ماہرین کے مطابق آبنائے ہرمز عالمی تجارت، خصوصاً تیل کی ترسیل کے لیے انتہائی اہم گزرگاہ ہے، جہاں کسی بھی قسم کی کشیدگی عالمی منڈیوں کو متاثر کر سکتی ہے۔ چین، ایران اور امریکا کے درمیان بڑھتی ہوئی لفظی جنگ اس بات کی نشاندہی کرتی ہے کہ خطے میں سفارتی اور عسکری دباؤ میں اضافہ ہو رہا ہے۔
تجزیہ کاروں کا کہنا ہے کہ اگر چین واقعی ایران کی عسکری مدد کرتا ہے تو اس سے نہ صرف مشرق وسطیٰ بلکہ عالمی طاقتوں کے درمیان تناؤ مزید بڑھ سکتا ہے، جبکہ آبنائے ہرمز کی صورتحال عالمی معیشت کے لیے ایک بڑا چیلنج بن سکتی ہے۔
