رپورٹ:(تازہ حالات خصوصی رپورٹ )
ترکی کی معروف دفاعی کمپنی بایکار (Baykar) نے ایک نیا مصنوعی ذہانت (AI) سے لیس کامیکازی ڈرون “K2” متعارف کرا دیا ہے، جسے جدید جنگی حکمت عملی کے لیے تیار کیا گیا ہے۔ کمپنی نے اس ڈرون کی رونمائی ایک خصوصی ویڈیو کے ذریعے کی جس میں اسے مختلف فضائی مشقوں اور حملہ آور صلاحیتوں کا مظاہرہ کرتے دکھایا گیا۔
کمپنی کے مطابق K2 ڈرون جدید مصنوعی ذہانت پر مبنی نیویگیشن اور ٹارگٹنگ سسٹم سے لیس ہے، جو اسے خودکار انداز میں پرواز، ہدف کی شناخت اور حملہ کرنے کی صلاحیت فراہم کرتا ہے۔ یہ ڈرون ایک ساتھ کئی ڈرونز کے “سوارم آپریشن” یعنی اجتماعی حملے کی صورت میں بھی کام کر سکتا ہے، جو مستقبل کی جنگوں میں ایک اہم ٹیکنالوجی سمجھی جا رہی ہے۔
تکنیکی خصوصیات کے مطابق K2 ڈرون کی پرواز کی حد 2000 کلومیٹر سے زیادہ بتائی گئی ہے جبکہ یہ تقریباً 200 کلوگرام تک دھماکہ خیز مواد لے جانے کی صلاحیت رکھتا ہے۔ اس کا زیادہ سے زیادہ ٹیک آف وزن تقریباً 800 کلوگرام بتایا گیا ہے۔
اس ڈرون کی ایک اہم خصوصیت یہ بھی ہے کہ یہ مختصر یا غیر تیار شدہ رن وے سے بھی پرواز کر سکتا ہے، جس سے اسے مختلف جنگی حالات میں استعمال کرنا آسان ہو جاتا ہے۔ دفاعی ماہرین کے مطابق یہ صلاحیت اسے میدانِ جنگ میں زیادہ لچکدار اور مؤثر بناتی ہے۔
بایکار کمپنی اس سے قبل بھی کئی کامیاب ڈرون تیار کر چکی ہے، جن میں بیرقدار TB2، بیرقدار آقنچی، بیرقدار TB3 اور جیٹ پاورڈ قزل ایلما شامل ہیں۔ ان ڈرونز کو دنیا کے کئی ممالک خرید چکے ہیں اور بعض خطوں میں ان کا عملی استعمال بھی ہو چکا ہے۔
دفاعی تجزیہ کاروں کا کہنا ہے کہ مصنوعی ذہانت سے چلنے والے ڈرونز مستقبل کی جنگوں میں اہم کردار ادا کر سکتے ہیں، کیونکہ یہ کم لاگت میں دور سے حملہ کرنے اور دشمن کے دفاعی نظام کو چکمہ دینے کی صلاحیت رکھتے ہیں۔
ماہرین کے مطابق ترکی کی دفاعی صنعت تیزی سے ترقی کر رہی ہے اور جدید ڈرون ٹیکنالوجی کی بدولت وہ عالمی اسلحہ مارکیٹ میں ایک نمایاں مقام حاصل کر رہا ہے۔
