(تازہ حالات خصوصی رپورٹ )
امریکہ کی بڑی ایئرلائنز کے سربراہان نے کانگریس سے مطالبہ کیا ہے کہ جاری جزوی حکومتی شٹ ڈاؤن فوری طور پر ختم کیا جائے اور ایئرپورٹس پر تعینات ہزاروں سکیورٹی اہلکاروں کو تنخواہیں ادا کی جائیں، کیونکہ موجودہ صورتحال فضائی سفر کو شدید متاثر کر سکتی ہے۔
میڈیا رپورٹس کے مطابق حکومتی تعطل کو 29 دن گزر چکے ہیں جس کے باعث تقریباً 50 ہزار ٹرانسپورٹیشن سکیورٹی ایڈمنسٹریشن (TSA) اہلکار بغیر تنخواہ کام کرنے پر مجبور ہیں۔ اس صورتحال کے باعث کئی ایئرپورٹس پر سکیورٹی عملے کی کمی پیدا ہو گئی ہے اور مسافروں کو طویل قطاروں اور تاخیر کا سامنا کرنا پڑ رہا ہے۔
امریکن ایئرلائنز، یونائیٹڈ ایئرلائنز، ڈیلٹا، ساؤتھ ویسٹ، جیٹ بلیو اور الاسکا ایئر سمیت بڑی فضائی کمپنیوں کے سربراہان نے کانگریس کو ایک مشترکہ خط میں خبردار کیا کہ اگر جلد کوئی حل نہ نکالا گیا تو فضائی سفر کا نظام مزید متاثر ہو سکتا ہے۔
ایئرلائنز کے مطابق کئی بڑے ایئرپورٹس پر مسافروں کو سکیورٹی چیک پوائنٹس پر غیر معمولی طور پر طویل اور سست قطاروں کا سامنا ہے۔ بعض مقامات پر سکیورٹی چیک کے لیے انتظار کا وقت دو گھنٹے سے بھی زیادہ ہو گیا ہے۔
حکام کا کہنا ہے کہ حکومتی تعطل کے آغاز کے بعد سے 300 سے زائد سکیورٹی اہلکار ملازمت چھوڑ چکے ہیں جبکہ کئی ایئرپورٹس کو عملے کی کمی کے باعث بعض سکیورٹی پوائنٹس عارضی طور پر بند بھی کرنا پڑے ہیں۔
یہ بحران ایسے وقت میں سامنے آیا ہے جب امریکہ میں اسپرنگ بریک کے دوران سفر کا رش بڑھنے والا ہے۔ ایئرلائنز کے اندازوں کے مطابق اس سال تقریباً 17 کروڑ سے زیادہ مسافر موسمِ بہار کے دو ماہ کے دوران فضائی سفر کریں گے جو گزشتہ سال کے مقابلے میں زیادہ ہے۔
ایئرلائنز کے سربراہان نے مطالبہ کیا کہ کانگریس فوری طور پر ہوم لینڈ سکیورٹی ڈیپارٹمنٹ کے لیے فنڈنگ کی منظوری دے تاکہ سکیورٹی عملے کو تنخواہیں مل سکیں اور فضائی سفر میں خلل پیدا نہ ہو۔
ماہرین کا کہنا ہے کہ اگر حکومتی تعطل طویل ہوگیا تو نہ صرف ایئرپورٹس پر سکیورٹی کا نظام متاثر ہوگا بلکہ پروازوں میں تاخیر اور منسوخی کے واقعات بھی بڑھ سکتے ہیں، جس سے امریکی فضائی سفر کا پورا نظام دباؤ کا شکار ہو سکتا ہے۔
