(تازہ حالات خصوصی رپورٹ )تہران: ایران میں اعلیٰ قیادت کے مستقبل سے متعلق اہم پیش رفت سامنے آئی ہے، جہاں عبوری قیادت کونسل کا چوتھا اجلاس صدر مسعود پزشکیان کی سربراہی میں منعقد ہوا۔ سرکاری خبر رساں ایجنسی کے مطابق اجلاس میں نئے سپریم لیڈر کے انتخاب کے طریقہ کار اور ملک کی دفاعی حکمتِ عملی پر تفصیلی غور کیا گیا۔
رپورٹ کے مطابق اجلاس میں اس بات پر اتفاق کیا گیا کہ آئین کے مطابق اسمبلی آف ایکسپرٹس کا اجلاس جلد بلایا جائے گا، جو ایران کے نئے سپریم لیڈر کے انتخاب کا اختیار رکھتی ہے۔ ایران کے آئین کے تحت 88 ارکان پر مشتمل یہ مذہبی و آئینی ادارہ ہی ملک کی اعلیٰ ترین قیادت کے انتخاب کا ذمہ دار ہوتا ہے۔
اسمبلی آف ایکسپرٹس کے رکن احمد خاتمی نے بھی کہا ہے کہ نئے سپریم لیڈر کے انتخاب کا عمل جلد مکمل کیا جائے گا۔ ان کے مطابق قیادت کے تعین کا عمل آئینی طریقہ کار کے مطابق انجام دیا جائے گا اور اس حوالے سے اہم پیش رفت ہو رہی ہے۔ انہوں نے خبردار کیا کہ موجودہ کشیدہ صورتحال میں دشمن قوتیں ایران کے اہم ریاستی اداروں کو نشانہ بنانے کی کوشش کر سکتی ہیں۔
اجلاس میں دفاعی امور بھی زیر بحث آئے اور مسلح افواج کی صلاحیتوں کو مزید مضبوط بنانے کے لیے اقدامات کی منظوری دی گئی۔ حکام کے مطابق موجودہ جنگی ماحول کے پیش نظر فوجی تیاریوں اور دفاعی وسائل کو بڑھانا ضروری سمجھا جا رہا ہے۔
دوسری جانب صدر مسعود پزشکیان نے کابینہ اجلاس سے خطاب کرتے ہوئے کہا کہ ایران ہمیشہ خطے میں ہمسایہ ممالک کے ساتھ اچھے تعلقات اور باہمی احترام کی پالیسی پر عمل کرتا آیا ہے۔ ان کا کہنا تھا کہ تہران نے سفارتی ذرائع کے ذریعے جنگ سے بچنے کی ہر ممکن کوشش کی، تاہم حالیہ امریکی اور اسرائیلی حملوں کے بعد ملک کو اپنے دفاع کا حق استعمال کرنا پڑا۔
سیاسی مبصرین کے مطابق ایران کی عبوری قیادت کے یہ اجلاس ایسے وقت میں ہو رہے ہیں جب خطے میں کشیدگی بدستور برقرار ہے اور ملک کی اعلیٰ قیادت کے مستقبل کے بارے میں اہم فیصلوں کی توقع کی جا رہی ہے۔ نئے سپریم لیڈر کے انتخاب کو ایران کی داخلی سیاست اور خطے کی سکیورٹی صورتحال میں ایک اہم موڑ قرار دیا جا رہا ہے۔
