(تازہ حالات خصوصی رپورٹ )
امریکی صدر ڈونلڈ ٹرمپ آبنائے ہرمز میں جہاز رانی بحال کرنے کے لیے مختلف ممالک پر مشتمل ایک بین الاقوامی اتحاد تشکیل دینے کی کوشش کر رہے ہیں۔ امریکی میڈیا رپورٹ کے مطابق واشنگٹن اس اتحاد کا اعلان آئندہ چند دنوں میں کر سکتا ہے۔
ذرائع کے مطابق اس اتحاد کا مقصد خلیج میں پھنسے تیل بردار جہازوں کو محفوظ راستہ فراہم کرنا اور عالمی توانائی سپلائی کو دوبارہ معمول پر لانا ہے۔ آبنائے ہرمز دنیا کی اہم ترین سمندری گزرگاہوں میں شمار ہوتی ہے جہاں سے عالمی تیل کی بڑی مقدار گزرتی ہے، اور حالیہ کشیدگی کے باعث اس راستے میں خلل پیدا ہونے سے عالمی منڈیوں میں بے چینی بڑھ گئی ہے۔
رپورٹس کے مطابق امریکی انتظامیہ ایک اور سخت آپشن پر بھی غور کر رہی ہے۔ ذرائع کا کہنا ہے کہ اگر خلیج میں تیل بردار جہازوں کی آمدورفت بحال نہ ہو سکی تو امریکا ایران کے اہم تیل ذخیرہ کرنے والے مرکز خارگ آئی لینڈ پر قبضہ کرنے جیسے اقدامات پر بھی غور کر سکتا ہے۔
ماہرین کے مطابق خارگ آئل ٹرمینل ایران کی تیل برآمدات کا مرکزی مرکز ہے اور ایران کی بڑی مقدار میں خام تیل اسی بندرگاہ کے ذریعے عالمی منڈی تک پہنچتا ہے۔ تاہم اس مقام پر کسی بھی قسم کی فوجی کارروائی کے لیے امریکی زمینی فوج کی تعیناتی درکار ہو سکتی ہے، جو خطے میں کشیدگی کو مزید بڑھا سکتی ہے۔
تجزیہ کاروں کا کہنا ہے کہ آبنائے ہرمز میں جاری بحران نے عالمی توانائی مارکیٹ کو شدید دباؤ میں ڈال دیا ہے۔ اگر یہ اہم سمندری راستہ طویل عرصے تک متاثر رہا تو اس کے اثرات نہ صرف تیل کی قیمتوں بلکہ عالمی معیشت اور توانائی کی سپلائی چین پر بھی پڑ سکتے ہیں۔
دوسری جانب سفارتی حلقوں کا کہنا ہے کہ واشنگٹن اپنے اتحادیوں کے ساتھ مسلسل رابطے میں ہے تاکہ خطے میں بحری سلامتی کو یقینی بنایا جا سکے اور توانائی کی عالمی ترسیل کو محفوظ رکھا جا سکے۔
