(تازہ حالات خصوصی رپورٹ ) — ایران کے دارالحکومت تہران میں واقع گاندھی اسٹریٹ کے علاقے میں ایک اسپتال اسرائیلی فضائی حملے کی زد میں آ گیا، جس کے نتیجے میں عمارت کو شدید نقصان پہنچا۔ یہ بات دو عینی شاہدین نے اتوار کے روز برطانوی خبر رساں ادارے رائٹرز کو بتائی۔
شاہدین کے مطابق دھماکے کے بعد اسپتال کی عمارت سے دھواں اٹھتا دیکھا گیا اور طبی عملہ فوری طور پر مریضوں کو محفوظ مقامات پر منتقل کرنے میں مصروف ہو گیا۔ اطلاعات کے مطابق زخمیوں اور زیر علاج مریضوں کو قریبی طبی مراکز میں منتقل کیا جا رہا ہے، تاہم فوری طور پر جانی نقصان کی باضابطہ تفصیلات سامنے نہیں آئیں۔
یہ واقعہ ایسے وقت پیش آیا ہے جب ایران اور اسرائیل کے درمیان کشیدگی غیر معمولی سطح تک بڑھ چکی ہے اور حالیہ دنوں میں دونوں جانب سے متعدد حملوں کی اطلاعات سامنے آ چکی ہیں۔ تہران میں ہونے والا یہ حملہ شہری تنصیبات تک کشیدگی کے پھیلاؤ کی ایک اہم مثال قرار دیا جا رہا ہے۔
تاحال اسرائیلی حکام کی جانب سے اس مخصوص مقام کو نشانہ بنانے سے متعلق کوئی تفصیلی بیان جاری نہیں کیا گیا، جبکہ ایرانی حکام کی طرف سے بھی نقصان کے حجم اور ممکنہ جانی نقصانات کے بارے میں مکمل اعداد و شمار جاری نہیں کیے گئے۔
انسانی حقوق کی خلاف ورزی اور طبی بحران
بین الاقوامی قوانین کے تحت جنگ کے دوران ہسپتالوں اور طبی مراکز کو نشانہ بنانا سنگین جنگی جرم تصور کیا جاتا ہے، تاہم حالیہ "آپریشن لائنز رور” کے دوران شہری تنصیبات کے متاثر ہونے سے تہران میں طبی بحران شدت اختیار کر گیا ہے۔ زخمیوں کی تعداد میں مسلسل اضافے اور ہسپتالوں کی تباہی نے امدادی کارروائیوں کو مشکل بنا دیا ہے۔
جنگ کی موجودہ صورتحال
یہ حملہ اتوار کے روز کیے گئے ان سلسلے وار حملوں کا حصہ ہے جن میں امریکہ اور اسرائیل نے تہران سمیت ایران کے 20 سے زائد صوبوں کو نشانہ بنایا ہے۔ جہاں اسرائیل اسے "درست انٹیلی جنس” کی بنیاد پر کی گئی کارروائی قرار دے رہا ہے، وہیں زمینی حقائق یہ بتا رہے ہیں کہ ان حملوں کی زد میں اب عام شہری اور مریض بھی آ رہے ہیں۔
