(تازہ حالات خصوصی رپورٹ)
امریکہ میں ایران کے خلاف جاری فوجی کارروائیوں پر ہونے والی سینیٹ کی ایک اہم سماعت کے دوران اس وقت ہنگامہ کھڑا ہو گیا جب ایک مظاہرہ کرنے والے شخص نے اجلاس میں مداخلت کرتے ہوئے سخت نعرے بازی شروع کر دی۔ واقعہ امریکی دارالحکومت واشنگٹن میں کیپیٹل ہِل پر پیش آیا جہاں سینیٹ آرمڈ سروسز کمیٹی کی ذیلی سماعت جاری تھی۔
رپورٹس کے مطابق احتجاج کرنے والے شخص کی شناخت برائن مک گِنِس کے نام سے ہوئی ہے جو شمالی کیرولائنا سے گرین پارٹی کے سینیٹ امیدوار اور سابق امریکی میرین بھی رہ چکے ہیں۔ انہوں نے سماعت کے دوران اچانک کھڑے ہو کر ایران کے خلاف امریکی جنگی کارروائیوں کی مخالفت کرتے ہوئے نعرہ لگایا کہ “کوئی اسرائیل کے لیے لڑنا نہیں چاہتا۔”
عینی شاہدین کے مطابق جب پولیس اہلکاروں نے انہیں ہال سے باہر نکالنے کی کوشش کی تو وہ دروازے کو پکڑ کر مزاحمت کرنے لگے جس کے بعد وہاں ہاتھا پائی کی صورتحال پیدا ہو گئی۔ اس دوران جھڑپ میں مظاہرہ کرنے والے شخص کا بازو زخمی ہو گیا جبکہ چند پولیس اہلکار بھی معمولی زخمی ہوئے۔
امریکی کیپیٹل پولیس کے مطابق برائن مک گِنِس کے خلاف پولیس افسر پر حملہ کرنے اور گرفتاری میں مزاحمت سمیت متعدد الزامات کے تحت مقدمہ درج کیا گیا ہے۔ حکام کا کہنا ہے کہ مظاہرہ کرنے والے شخص نے اہلکاروں کی جانب سے باہر لے جانے کی کوشش کے دوران شدید مزاحمت کی۔
دوسری جانب مونٹانا سے تعلق رکھنے والے ریپبلکن سینیٹر ٹم شیہی نے کہا کہ انہوں نے صورتحال کو قابو میں کرنے کے لیے پولیس کی مدد کی۔ ان کے مطابق مظاہرہ کرنے والا شخص جان بوجھ کر تصادم پیدا کرنا چاہتا تھا۔
سیاسی تجزیہ کاروں کے مطابق ایران کے خلاف امریکی فوجی کارروائیوں کے بعد امریکہ کے اندر بھی اس جنگ پر بحث اور اختلاف بڑھتا جا رہا ہے۔ مختلف سرویز اور احتجاجی مظاہروں سے ظاہر ہوتا ہے کہ امریکی معاشرے میں اس جنگ کے حوالے سے رائے منقسم ہے۔
