رپورٹ:
ترکی کے وزیر صنعت و ٹیکنالوجی مہمت فاتح کاجر نے دعویٰ کیا ہے کہ اس وقت عالمی فوجی ڈرون مارکیٹ کا تقریباً 65 فیصد حصہ ترکی کے پاس ہے، جو اس بات کی نشاندہی کرتا ہے کہ ملک بغیر پائلٹ طیاروں کی ٹیکنالوجی میں تیزی سے ایک اہم عالمی طاقت بن چکا ہے۔
ایک ٹی وی انٹرویو میں ترک وزیر نے کہا کہ اس عالمی حصے کا بڑا حصہ ترک دفاعی کمپنی بائیکار (Baykar) کے تیار کردہ ڈرونز کا ہے، جن میں مشہور بیرقدار ٹی بی2 ڈرون بھی شامل ہے۔ یہ ڈرون مختلف جنگی اور نگرانی کے مشنز میں استعمال کیا جا رہا ہے اور کئی ممالک اسے اپنی دفاعی صلاحیتوں میں شامل کر چکے ہیں۔
کاجر کے مطابق ترکی نے دہشت گردی کے خلاف آپریشنز کے دوران بغیر پائلٹ طیاروں کی اہمیت کو بہت جلد سمجھ لیا تھا، جس کی وجہ سے اس شعبے میں تحقیق اور پیداوار کو تیزی سے فروغ ملا۔ ان کا کہنا تھا کہ جدید جنگوں میں ڈرونز، خاص طور پر خودکار اور حملہ آور ڈرونز، ایک اہم ہتھیار بن چکے ہیں۔
ترک وزیر نے بتایا کہ ترکی کی دفاعی صنعت اب تیزی سے ترقی کر رہی ہے اور تقریباً ہر چند ہفتوں میں ایک نیا دفاعی منصوبہ یا ٹیکنالوجی متعارف کرائی جا رہی ہے۔ ان کے مطابق آئندہ مرحلے میں ترکی بغیر پائلٹ نظام، ریڈار اور میزائل ٹیکنالوجی میں مزید ترقی پر توجہ دے گا اور دفاعی مصنوعات کی بڑے پیمانے پر پیداوار میں اضافہ کرے گا۔
انہوں نے کہا کہ گزشتہ دو دہائیوں کے دوران قومی میزائل پروگرام پر کی جانے والی سرمایہ کاری کے مثبت نتائج سامنے آ رہے ہیں۔ ترک دفاعی ادارے روکیتسان اور TÜBİTAK SAGE جدید میزائل ٹیکنالوجی تیار کرنے میں کامیاب ہو چکے ہیں، جبکہ 2000 کلومیٹر رینج تک مار کرنے والے میزائلوں کے منصوبے پر بھی پیش رفت جاری ہے۔
دفاعی ماہرین کے مطابق عالمی سطح پر فوجی ڈرون مارکیٹ تیزی سے بڑھ رہی ہے۔ ایک حالیہ رپورٹ کے مطابق یہ مارکیٹ 2025 میں تقریباً 24 ارب ڈالر سے بڑھ کر 2032 تک 50 ارب ڈالر سے زیادہ ہو سکتی ہے۔
عالمی سطح پر امریکا، اسرائیل، ترکی، چین اور روس کو فوجی ڈرون ٹیکنالوجی کے بڑے پیداواری ممالک میں شمار کیا جاتا ہے۔ تجزیہ کاروں کے مطابق بڑھتے ہوئے جغرافیائی تنازعات اور جدید جنگی حکمت عملیوں کے باعث ڈرون ٹیکنالوجی مستقبل کی جنگوں میں مرکزی کردار ادا کر سکتی ہے۔
