ایران تنازع، تیل کی عالمی سپلائی خطرے میں
(تازہ حالات خصوصی رپورٹ )
مشرق وسطیٰ میں جاری کشیدگی کے باعث عالمی تیل مارکیٹ کو شدید جھٹکا لگنے کا خدشہ ظاہر کیا جا رہا ہے، جہاں ماہرین کا کہنا ہے کہ یہ تنازع طویل عرصے تک جاری رہ سکتا ہے اور اس کے اثرات عالمی توانائی سپلائی پر نمایاں ہوں گے۔
امریکی توانائی امور کی سابق اعلیٰ عہدیدار رندا فہمی کے مطابق موجودہ صورتحال میں ایران کی جانب سے آبنائے ہرمز پر اثر و رسوخ عالمی مارکیٹ کے لیے ایک بڑا خطرہ بن سکتا ہے۔ یہ بحری راستہ دنیا میں تیل کی ترسیل کے لیے نہایت اہم سمجھا جاتا ہے، جہاں کسی بھی قسم کی رکاوٹ عالمی قیمتوں کو متاثر کر سکتی ہے۔
رپورٹس کے مطابق اگر کشیدگی میں مزید اضافہ ہوا تو تیل کی سپلائی متاثر ہو سکتی ہے، جس کے نتیجے میں قیمتوں میں تیزی سے اضافہ اور عالمی معیشت پر دباؤ بڑھنے کا خدشہ ہے۔ ماہرین کا کہنا ہے کہ سرمایہ کار پہلے ہی اس صورتحال کو سنجیدگی سے لے رہے ہیں اور توانائی مارکیٹس میں غیر یقینی کیفیت بڑھ رہی ہے۔
ادھر یمن میں ایران کے حمایت یافتہ حوثی گروپ کی سرگرمیوں کو بھی اس بحران میں اضافے کی ایک بڑی وجہ قرار دیا جا رہا ہے۔ تجزیہ کاروں کے مطابق اگر یہ تنازع مزید پھیلتا ہے تو اس کے اثرات نہ صرف خطے بلکہ عالمی سطح پر بھی محسوس کیے جائیں گے۔
ماہرین نے خبردار کیا ہے کہ موجودہ حالات میں توانائی کی سپلائی چین متاثر ہونے کا خطرہ بڑھ گیا ہے، جس کے باعث مختلف ممالک متبادل ذرائع اور ہنگامی منصوبوں پر غور کر رہے ہیں۔
مبصرین کا کہنا ہے کہ اگر صورتحال جلد قابو میں نہ آئی تو یہ بحران عالمی سطح پر مہنگائی، ایندھن کی قیمتوں میں اضافے اور اقتصادی سست روی کا باعث بن سکتا ہے، جس کے اثرات عام صارفین تک بھی پہنچیں گے۔
